სრული სამართლებრივი პოლიტიკები: Terms & Conditions · Privacy Policy · Donation & Refund Policy · Legal InformationFAQCard Donation
დონაციისა და დახმარების წესები
1. მიზნობრივი დახმარება
თუ დონორი უთითებს კონკრეტულ ქეისს ან მიზანს, ორგანიზაცია თანხას შესაბამისი საჭიროებისთვის მიმართავს შესაძლებლობისა და ქეისის აქტუალობის ფარგლებში.
2. საჭიროების ცვლილება
თუ კონკრეტული საჭიროება სრულად დაფინანსდა, შეიცვალა ან დახმარება ობიექტურად ვეღარ ხორციელდება, დარჩენილი თანხა შეიძლება გამოყენებულ იქნეს იმავე ბენეფიციარის სხვა აუცილებელ საჭიროებაზე ან მსგავს გადაუდებელ საქველმოქმედო მიზანზე.
3. ანგარიშგება
ორგანიზაცია შესაძლებლობის ფარგლებში ინახავს დახმარების დამადასტურებელ მასალებს და პერიოდულად აქვეყნებს ქეისების განახლებებსა და ანგარიშგებას, ბენეფიციართა პირადი მონაცემებისა და ღირსების დაცვით.
4. პირადი ინფორმაცია
ბენეფიციარების პირადი ინფორმაცია ქვეყნდება მხოლოდ დახმარების მიზნისთვის საჭირო მოცულობით.
5. გადახდის არხები
დონორს შეუძლია გამოიყენოს საიტზე მითითებული GlobalGiving, PayPal, Wise ან პირდაპირი საბანკო გადარიცხვა. მესამე მხარის პლატფორმებს შეიძლება ჰქონდეთ საკუთარი საკომისიოები და წესები.
კონფიდენციალურობა
საკონტაქტო ფორმით ან ელფოსტით მიღებული ინფორმაცია გამოიყენება მხოლოდ კომუნიკაციისა და საქველმოქმედო საქმიანობის ადმინისტრირებისთვის. ჩვენ არ ვყიდით დონორთა პერსონალურ მონაცემებს.
დახმარების მოთხოვნა და ბენეფიციარის დოკუმენტები
დახმარების მოთხოვნის განხილვისას „სიკეთის ნერგმა“ შეიძლება მოითხოვოს მხოლოდ კონკრეტული ქეისისთვის საჭირო დოკუმენტები და ინფორმაცია, მათ შორის: დახმარების მოთხოვნის წერილი, პირადობის ან წარმომადგენლობის დამადასტურებელი ინფორმაცია, სოციალური მდგომარეობის დამადასტურებელი მასალა, ფორმა №100, ექიმის დასკვნა ან დანიშნულება, რეცეპტები, კვლევები, ფოტო/ვიდეო და საჭიროების დამადასტურებელი სხვა შესაბამისი დოკუმენტები.
ყველა დოკუმენტი ყველა შემთხვევაში სავალდებულო არ არის. მოთხოვნილი მასალების მოცულობა დამოკიდებულია კონკრეტულ საჭიროებასა და დახმარების ტიპზე.
არასრულწლოვანი ბენეფიციარი
არასრულწლოვნის შემთხვევაში დახმარების მოთხოვნა და შესაბამისი მასალები უნდა წარმოადგინოს მშობელმა ან კანონიერად უფლებამოსილმა წარმომადგენელმა.
თუ მშობელი ან კანონიერი წარმომადგენელი საკუთარი ინიციატივით უგზავნის ორგანიზაციას დახმარების მოთხოვნის წერილს და მასთან ერთად ბავშვის ფოტოებს, ვიდეოებს, ფორმა №100-ს, ექიმის დანიშნულებებს, რეცეპტებს ან სხვა შესაბამის მასალას საქველმოქმედო დახმარების საჯაროდ მოძიების მიზნით, ეს წარმოადგენს მის მიერ მოწოდებული შესაბამისი მასალის საქველმოქმედო კამპანიის ფარგლებში გამოყენებაზე თანხმობის საფუძველს იმ ფარგლებში, რაც აუცილებელია დახმარების მოთხოვნის წარმოდგენისა და კანონიერად დასაშვები საჯარო კომუნიკაციისთვის.
ორგანიზაციისთვის დოკუმენტის გადმოცემა არ ნიშნავს შეუზღუდავ თანხმობას ყველა პერსონალური, საიდენტიფიკაციო ან სამედიცინო მონაცემის საჯაროდ გავრცელებაზე. საჯაროდ გამოიყენება მხოლოდ მიზნისთვის აუცილებელი ინფორმაცია, ბენეფიციარის ღირსების, პირადი ცხოვრების და განსაკუთრებით ბავშვის უფლებების დაცვით.
ინფორმაციის სისწორე და გადამოწმება
დახმარების მომთხოვნი პასუხისმგებელია მის მიერ მოწოდებული ინფორმაციის სისწორეზე. ორგანიზაციას უფლება აქვს საჭიროების შემთხვევაში მოითხოვოს დამატებითი ინფორმაცია ან დოკუმენტები და გადაამოწმოს წარმოდგენილი გარემოებები კანონიერ და გონივრულ ფარგლებში.
განაცხადის ან დოკუმენტების მიღება ავტომატურად არ ნიშნავს დახმარების გაწევის, თანხის შეგროვების ან კონკრეტული შედეგის გარანტიას.